Ginbuksas yana han National Democratic Front-Eastern Visayas komo mapan-uwat an mga ginhimo han militar nga mga asosasyon nga nag-ulputan ha magkalain-lain nga parte han Leyte kasunod han kampanya han pwersahay nga pagpasurender ha ilarum han pamumuno han 802nd Infantry Brigade.
“Buwa ini nga mga ginhimo han militar nga asosasyon tungod kay an mga kaapi hini, mga biktima han kampanya han pwersahay nga pagpasurender. Ginhihikawan an mga kaapi han katungod nga magdemanda para ha tinuod nga reporma ha tuna. Lugod, ginpapasulong hini nga mga asosasyon an interes han dagko nga agaron maytuna ngan han 802nd IBde nga paiwason an mga parag-uma ha ira gud kalugaringon nga tuna, ngan ginpapagrabe an monopolyo ha tuna ha kabaryuhan han Leyte,” sering han NDF-EV.
Ginhimo han NDF-EV an pahayag komo reaksyon ha bag-o nga gintukod nga mga “asosasyon han mga trabahador para ha kamurayawan ngan kauswagan” ha diri mamenos ha lima nga bungto ha Southern Leyte. Diri liwat mamenos ha usa an gintukod ha Ormoc City, Leyte. Sigon ha 802nd IBde, ginkokomponer ini nga mga grupo han mga “hadto anay rebelde.”
Kundi sering han NDF-EV, ini liwat nga mga erya an nagin pokus han grabe nga militarisasyon hini nga naglabay nga mga bulan, partikular ha Southern Leyte, ikalima nga distrito han Leyte, ngan syudad han Ormoc. “Kadam-an, kun diri ngatanan han mga kaapi han mga asosasyon nga gintukod han militar, mga ordinaryo nga sibilyan o hadto anay kaapi han BHB nga maiha na nga nagretiro kundi gintarhug nga sumurender ha butnga han grabe nga presensya han militar ngan kampanya nga saywar.”
Hadin Septyembre, naghulog an AFP han diri mamenos ha tulo nga bomba ha bubkiron nga parte ha bawnderi han Albuera ngan Javier, kun diin waray hira naigo bisan usa nga Pula nga mangaraway kundi nagdurot hin ngirhat ha masa nga parag-uma ha lugar. Padayon liwat an mga panmilitar nga operasyon ha Ormoc City ngan Kananga agud seguruhon an milyun-milyon kapisos nga balor hin proyekto nga pangalsada ngan dagko nga negosyo han mga agaron maytuna sugad han pamilya Torres.
Gin-anunsyo liwat han militar nga naserbe komo presidente han Leyte-Tandaya-Integrated Peace and Development Workers Association hi Thelma “Ka Mayang” Pundulanan. Sigon ha NDF-EV, traydor ha masa nga parag-uma hi Pundulanan ngan naserbe komo sundalo han 802nd IBde.
“Hadton 2019, nakigkonsabuhay an 802nd IBde ngan an dagko nga agaron maytuna ha Leyte kan Pundulanan agud tudlukon an mga kaapi han organisasyon han parag-uma ha San Isidro, Calubian, ngan Kananga nga ira pupwersahon nga ‘sumurender.’ Gin-red-tag nira ngan ginbungkag ini nga mga tinuod nga organisasyon han parag-uma, ngan gin-gamit an programa nga E-CLIP agud uwaton ngan tarhugon hira nga bayaan an tuna nga ira ginhuhulad.
“Yana, ginliwanan ini han militar hin mga asosasyon nga hira mismo an nagtukod, ginpapamunuan han kalugaringon nira nga tropa, ngan ginkakaapihan han mga biktima han pwersahay nga pagpasurender,” sering han NDF-EV.
Sering pa hini, “Nagpinanukod an 802nd IBde han nga mga buwa nga ‘asosasyon han trabahador’ komo kaparte han ira pagsaywar ha masa nga parag-uma ha Leyte. Gin-aatentar han militar nga pagawason nga hukas-ha-kasingkasing nga ginsurender han masa an ira pakigbisog kontra ha dagko nga agaron maytuna ngan dagko nga komprador.
“Kundi imposible para ha BHB ha Leyte nga magpabilin ha butnga han sustenido nga panmilitar nga operasyon kun waray ini nahiaaguman nga suporta tikang ha masa nga parag-uma, nga grabe na an karuyagon nga tapuson an ira gin-aantos nga pyudal ngan bagapyudal nga paniniyupi pinaagi han paglansar han gerra han katawhan.
“Ha urhi, dako nga pataraw-an kun tiunan-o gatus-gatos na an kaapi hini nga mga buwa nga asoasyon kundi gin-uuru-utro gihapon han 802nd IBde nga ‘waray na insurhensiya’ ha Leyte. Waray hunong an ira operasyon samtang natikadamo nga sibilyan an pwersahay nga ginpapasurender. Hira mismo an nagbubuksas ha kalugaringon nira nga buwa.”
Nanawagan an NDF-EV ha ngatanan nga Leyteño nga ibuksas ini nga mga buwa nga asosasyon. “Kinahanglan nira igsalikway an kampanya han pagpasurender han militar ngan padayon nga ipakigbisog an tinuod nga reporma ha tuna.
“Atubangan han todo-gerra han kaaway ngan natikagrabe nga krisis, labaw nga kinahanglan nga tukuron an mga rebolusyunaryo nga organisasyon masa ha mga baryo ngan ipasulong an agraryo nga rebolusyon ngan armado nga pakig-away agud kab-uton an tinuod nga kauswagan,” pagtatapos han NDF-EV.
PRWC Newsroom 