Atol sa ika-73 nga anibersaryo sa United Nations Universal Declaration of Human Rights (UN-UDHR) Day o Internasyunal nga Adlaw sa Tawhanong Katungod, Disyembre 10 2021, taas kamaong nakighiusa ang Bagong Hukbong Bayan Surigao del Sur (BHB-SDS) ngadto sa tanang katawhang Pilipino ug sa tibuok katawhan sa kalibutan sa mapadayunong pakigbisog aron irespeto ang tawhanong katungod. Niini nga adlaw usab, angayang kondenahon sa katawhan ang dili makikatawhang palisiya sa berdugong rehimeng Duterte ug iyang alipures nga AFP/PNP/ paramilitar nga mibunga sa dinaghang pagpanglapas sa tawhanong katungod. Dugang pa, pasidunggan ang mga rebolusyonaryo ug mga tigpanalipod sa tawhanong katungod sa paghalad sa ilang kinabuhi aron ipanghingusog ang kamahinungdanon sa pagrespeto sa tawhanong katungod batok sa mga madaugdaugon ug mapahimuslanon.
Partikular sa Surigao del Sur, ubay ubay ang mga nasinating pagyatak sa katungod sa mga Surigaonon. Dul-an napulo na ang biktima sa ekstra- hudisyal nga pagpamatay diin usa(1) niini menor de edad. Daghan ang gipasakahan og tinumo-tumong kaso ug dul-an gatos na ka inosenteng sibilyan ang gipreso tungod niini.
Lain pa, usa ka sibilyan usab (mag uuma sa Brgy. Matho, Cortes) ang gigapos sa berdugong 36th IB PA atol sa ilang kombat operisyon sa pasangil nga kini usa ka membro sa BHB. Gibalay-balay pag- imbestiga ang gihimo sa AFP sa kabaryohan sa lungsod sa Madrid, Lianga, Cantilan, nga miresulta sa grabeng kahadlok (security threat) sa mga lumulupyo kay kuno sila mga supporter sa CPP-NPA. Peke ang maskarang gisul -ot sa PNP/AFP sa ilang programang pagpasurender tungod kay klaro ug tataw ang korapsyon niini nga programa. Hakop sa mga dagkung opisyales sa gobyerno ang budget sa Enhanced Comprehensive Local Integration Program (E-CLIP) nga alang unta sa mga pugos nga gipasurender. Hangtod karon, walay nadawdaw ang kadaghanan sa mga pekeng surenderees sa mga pasalig sa AFP.
Tin-aw nga dili kalinaw ug kalamboan ang gi-implementar sa AFP sa ilang Retooled Commmunity Support Program (RCSP) dinhi sa probinsya. Gipakaylap niini ang impluwensiyang butahan ug ilayo ang katawhan ilabina ang mga kabatan-onan sa tinuod nga sistema sa katilingban. Lutaw ang mga anti-sosyal nga aktibidad nga gipasiugdahan mismo sa AFP sama sa pagsabwag sa pornograpiya, illegal nga druga, sugal sama sa sabong ug baraha, ilimnong makahubog, penile implant ug pagbungkag sa relasyong magtiayon pinaagi sa pagpangabet.
Lain pa, walay nahimong lakang ang gobyerno aron panalipdan ang kinaiyahan pinaagi sa paturagas nga pagpamutol og kahoy. Bisan anaa ang presensya sa mga AFP/CAA Detatsment ug pwersang nag-RCSP sa lugar, walay hunong ang illegal ug paturagas nga pagpamutol og kahoy nga miresulta sa samot nga pagkaupaw sa gamayng kalasangang nabilin sa probinsya. Nahitabo kini apan dili limitado lang sa Ebuan, Brgy. Mampi, Lanuza; Himat-e, Brgy. Mabuhay, Brgy. Maitom, Brgy. Awasian, Tandag City ug mga lungsod sa Lianga, San Miguel ug Tago. Wala pa kini labot sa kabukirang naopaw tungod sa paturagas nga pagmina usab. Luag nga gitugutan kini nila tungod kay nagadawat sila og suborno gikan sa mga iligalista.
Busa niini nga adlaw sa paghandum sa ika-73 nga kasumaran sa Adlaw sa Tawhanong Katungod, ang BHB Surigao del Sur naghagit sa tanang katawhan nga ipahugot ang panaghiusa ug suklan ang mga pasistang pangatake sa rehimen. Hugot nga ibutyag ang ilang walay hunong nga pagpanglapas sa tawhanong katungod ug papanubagon niini.
Walay laing molihok kundili kitang mga kabus ug gidaug daug aron kab-oton ang hustisya sa tanang biktima, pagpabarog sa tawhanong katungod ug sa padayong pagdepensa sa kinaiyahan sa kinatibuk ang langkob.
Alang sa BHB, mainiton kining nakighiusa sa katawhan pinaagi sa pursigidong paningkamot nga suklan sa hingpit ang pasismo sa AFP/PNP/paramilitar ilalom sa rehimeng Duterte. Ang armadong pakigbisog mao ang pinakataas nga porma sa pakigbisog sa mga nayatakan aron makab-ot ang hingpit nga kalinaw batok sa pasismo sa estado.
Katawhan, bugkuson ang kusog aron Ipakigbisog ang tawhanong katungod!
Ibutyag ug kondenahon ang kabangis sa tiranong Duterte ug mga alipures niini!
Suklan ang pasismo sa estado!
Iasdang ang armadong pakigbisog!
PRWC Newsroom 