Nagpahayag hin grabe nga kangalas an National Democratic Front-Eastern Visayas ha waray kaawod nga pangandidato han retirado nga kumander han 802nd Infantry Brigade nga hi Gen. Lope Dagoy komo meyor han Albuera, Leyte para ha eleksyon 2022.
“Waray mapaparayaw nga rekord hi Dagoy kundi grabe nga pasismo ngan hilaba nga listahan han panmasaker, buwa nga mga pagpasurender, ngan grabe nga kurapsyon. Waray hiya maeestorya nga plataporma kundi dugang nga pagpagamot han militarismo ha sibil nga burukrasya ngan pagduso han iya korap ngan pasista nga adyenda ha Leyte.”
Ginsering han NDF-EV nga tungod kay imposible para ha usa nga ginkakangalsan nga pasista nga magdaug ha usa nga demokratiko nga eleksyon, segurado nga gagamiton ni Dagoy an pampubliko nga pondo nga iya ginkawat ha sakob hin pira katuig han pwersahay ngan buwa nga pagpasurender ha Leyte, maksimisahon an iya impluwensya ha AFP, PNP ngan MTF-ELCAC ha Albuera agud gastuson an ira pondo ngan pagiuson an ira pwersa ha pangampanya para ha iya ha kondukta han ira mga kontra-insurhensiya nga operasyon, ngan tarhugon an mga biktima han iya kampanya nga pagpasurender agud magserbe komo kadugangan nga makinarya ha eleksyon.
Hi Lope Dagoy amo an lanong nga massacre general han isla han Leyte. Antes magin kumander han 802nd IBde, nagserbe hiya komo kumander han 19th Infantry Battalion kun diin ginmando niya an pagmasaker ha walo nga parag-uma nga nakada ha uma ha Palo, Leyte hadton 2005. Grabe hiya nga ginkakangalsan bisan han komunidad han mga akademiko ngan siyentista tungod ha pagpatay ha nangunguna nga botanist han nasud nga hi Dr. Leonard Co ngan an iya mga kaupod nga giya ha sulod han Energy Development Complex ha Kananga, Leyte hadton 2010, nga ginbansagan liwat komo “Kananga 3 massacre.”
Lanong liwat hi Dagoy, usa nga panatiko han berdugo nga hi Gen. Jovito Palparan, ha paghimo niya komo huthutan hin kita ha kampanya nga pagpasurender ha Leyte. Hadton 2019, ginbursa niya an milyun-milyon nga pondo tikang ha Enhanced Comprehensive Livelihood Integration Program (E-CLIP) pinaagi han pagpirit ha masobra 1,200 nga parag-uma tikang ha mga bungto han San Isidro ngan Calubian nga sumurender. Nakigkunsabo hiya ha mga lokal nga agaron maytuna nga mga Larrazabal ngan Leyte 3rd district representative Vicente “Ching” Veloso III agud uwaton an mga parag-uma gamit an mga saad nga benepisyo han E-CLIP agud paiwason hira ha tuna nga ira ginhuhulad. Samtang, ginhakin niya ngan han iya mga igkasi heneral an kwarta han E-CLIP, ginpalipay an mga agaron maytuna ngan nakagpagawas hin buwa nga ihap han mga surenderi.
Lurong pa hiya nga nagdeklara hin buaw nga “kadaugan” ha pwersahay niya nga pagpasurender han mga ordinaryo nga parag-uma ngan gin-anunsyo nga mahihimo niya nga ig-utro niya ini ha Samar kun hiya an kumatin hin panrehiyon nga kumand han 8th Infantry Division.
“Waray kaawod hiya nga nagpabati hiunong han iya ambisyon nga makuha an liderato han 8th ID kundi naunahan na la hiya han iya mga karibal. Sugad na la an iya kangalas ha iya kapakyasan nga yana, bumirik hiya ngadto ha reaksyunaryo nga eleksyon agud matumanan an iya waray tubtuban nga kauhaw ha poder,” sering han NDF-EV.
“Ha urhi, an kampanya nga pagpasurender han Armed Forces of the Philippines naserbe la agud pondohan an huralwa nga kinabuhi han mga naganansya ha mga nasurender, ha pagpahitaas han ranggo han mga heneral, ngan ha kapital ha eleksyon han mga naruruyag magin mayor sugad kan Dagoy. Samtang nalangoy hira ha kahuralwaan, naluludlod ha kakablasan ngan kagutom an masa nga parag-uma nga ginpupwersa nira nga pumostura komo mga surenderi han BHB agud makakuha hin pira kasensilyo tikang ha milyun-milyon nga ginkurakot han mga pasista nga heneral.”
Nanawagan an NDF-EV ha katawhan han Leyte nga pakyason an militarista ngan pampulitika nga amibisyon ni Dagoy ngan padayon nga idemanda an hustisya para ha ngatanan nga biktima han iya panmatay ha isla. “Kinahanglan nira ibuksas hi Dagoy komo usa nga parupanmatay, berdugo, matiyupion ha masa nga parag-uma ngan ginbaydan nga mersenaryo han mga despotiko nga agaron maytuna ngan dagko nga kapitalista han Leyte. Kinahanglan gud nira ihimulag ngan pugngan hiya nga makakuha pa hin dugang nga impluwensya ngan rekurso nga gagamiton niya ha mas grabe nga paniniyupi ngan pananalumpigos ha katawhan.”
PRWC Newsroom 